পৰিচালনাঃ আৰতি তালুকদাৰ
ব্ৰকলি ৰাখক খাদ্য তালিকাত
অসমীয়াৰ বাবে পুষ্টিকৰ উপাদানৰে ভৰপূৰ ব্ৰকলি তুলনামূলকভাৱে নতুন। কিন্তু গুণৰ ক্ষেত্ৰত ই আন বহু খাদ্যক পৰাস্ত কৰিব পাৰে।
* ব্ৰকলিত প্ৰচুৰ পৰিমাণে আঁহ, ভিটামিন এ, ভিটামিন বি, ভিটামিন চি, মেংগানিজ, পটাছিয়াম, ফছফৰাছ, মেগনেছিয়াম আদি পোৱা যায়। গতিকে ৰোগ প্ৰতিৰোধ ক্ষমতা বৃদ্ধি কৰিবলৈ ব্ৰকলিৰ কোনো বিকল্প নাই।
*ব্ৰকলিত কেলচিয়াম থাকে, যিয়ে হাড় মজবুত কৰাত সহায় কৰে।
* পৰীক্ষামূলকভাৱে প্ৰমাণিত হৈছে যে ব্ৰকলি কেন্সাৰ প্ৰতিৰোধ কৰিবলৈ সক্ষম। ইয়াৰ ফাইটোনিউট্ৰিয়েণ্টে শৰীৰৰ বিষমুক্ত এনজাইমক উদ্দীপিত কৰে। ফলত শৰীৰে স্বাভাৱিকতে কেন্সাৰ সৃষ্টিকাৰী আৰু অন্যান্য ক্ষতিকাৰক বিষাক্ত পদাৰ্থবোৰ বাহিৰ কৰি দিয়ে। ব্ৰকলিত ইণ্ডোল-৩-কাৰবিনল নামৰ যৌগ এটা থাকে। ই মহিলাৰ স্তন কেন্সাৰ আৰু ছাৰ্ভাইকেল কেন্সাৰৰ সম্ভাৱনা হ্ৰাস কৰাৰ লগতে ইয়াৰ বৃদ্ধিও ৰোধ কৰে। ব্ৰকলি খালেও ডিম্বাশয়ৰ কৰ্কট ৰোগ প্ৰতিৰোধ হয় বুলি কোৱা হয়।
*ব্ৰকলি ফোলেটৰ উৎকৃষ্ট উৎস। ই নতুন কোষ, তেজ তৈয়াৰ কৰাত সহায় কৰে। গৰ্ভৱতী মহিলাৰ বাবে ফলেট খাদ্যৰ এক অপৰিহাৰ্য উপাদান। এফালে গৰ্ভস্থ শিশুৰ স্নায়ুতন্ত্ৰ গঠনত সহায় কৰে, আনফালে জন্মগত বিসংগতিৰ পৰা শিশুক ৰক্ষা কৰে। কেৱল সেয়াই নহয়, ডিপ্ৰেছন কমোৱাতো ফ’লেট অতি উপযোগী বুলি ধৰা পৰিছে। ই চেৰ’টনিন হৰম’নৰ পৰিমাণ বৃদ্ধি কৰিবলৈ সক্ষম হয়। ফলত খাদ্যত পৰ্যাপ্ত পৰিমাণৰ ব্ৰকলি থাকিলে হতাশাৰ লক্ষণসমূহ বহু পৰিমাণে লাঘৱ হ’ব পাৰে।
*ব্ৰকলিয়ে মহিলাৰ ৰজোনিবৃত্তিৰ পূৰ্বে হোৱা কিছুমান লক্ষণ যেনে পেট ফুলা, ভৰি ফুলা আদি উপশম কৰাত সহায় কৰে।
নিমখ বেছি হ’লে
খাদ্যত বেছি নিমখ পৰি যায় নেকি কেতিয়াবা ? কেনেকৈ চম্ভালিব?
ৰুচি অনুসৰি নেমুৰ ৰস দিব। এচিডিক পদাৰ্থই নিমখ নিষ্ক্ৰিয় কৰিব পাৰে।
• যদি চূপ বা ষ্টুৰ দৰে ৰন্ধা হয় তেন্তে প্ৰয়োজন অনুসৰি পানী দিব। ষ্টকও দিব পাৰি, কিন্তু সাৱধান হওক যাতে ষ্টকত নিমখ নাযায়। ৰন্ধাখিনি বেছি পাতল হ’লে পানীত কৰ্ণফ্লাৱাৰৰ দি ঘন কৰি লওক।
ক্ৰীম দিব পাৰে, টেঙা দৈও দিব পাৰে।
• গ্ৰেভি ভিত্তিক ৰন্ধা-বঢ়াৰ বাবে অলপ ময়দা দি চেষ্টা কৰক। ময়দাবোৰ অতিৰিক্ত নিমখ শোষণ কৰি ওপৰলৈ ওপঙি যাব, তেতিয়া পেলাই দিব। আনহাতে সিজোৱা আলুও মিহলাই দিব পাৰে।
• যদি নিমখৰ মাত্ৰা কম পৰিমাণে বেছি হৈছে তেন্তে আপুনি অলপ চেনি দিব পাৰে।
• ইয়াৰ লগত মাখন বা পনিৰৰ দৰে নিমখীয়া বস্তু পৰিবেশন কৰিবলৈ চেষ্টা কৰক।
*গ্ৰামাঞ্চলৰ ভোজবোৰত পূৰ্বৰ দিনবোৰত (এতিয়াও) নিমখ বেছি হ’লে চৌকাৰ পৰা জ্বলন্ত কাঠখৰি উলিয়াই উতলি থকা থালিত সুমুৱাই দিয়া হৈছিল । ইয়াৰ ফলত খৰিৰ এঙাৰে অতিৰিক্ত নিমখভাগ শোষণ কৰি লৈছিল । আজিকালি ৰন্ধন গেছ ব্যৱহাৰ কৰাসকলৰ বাবে অৱশ্যে সেই সুবিধা নাই ।
*ঋতু পৰিৱৰ্তনৰ সময়ত নিজক কেনেকৈ সুস্থ ৰাখিব
ঋতু অনুসৰি ঠাণ্ডা আৰু গৰমৰ পৰা শৰীৰক ভিতৰৰ পৰা ৰক্ষা কৰক। নিয়মীয়া খাদ্যত প্ৰয়োজনীয় ভিটামিন আৰু খনিজ পদাৰ্থ ৰাখিব লাগে। বিশেষজ্ঞসকলে কি পৰামৰ্শ দিছে জানো আহক ।
শৰীৰটো সুস্থ কৰি ৰাখিবলৈ নিয়মিতভাৱে পৰ্যাপ্ত পৰিমাণৰ এন্টি অক্সিডেন্ট গ্ৰহণ কৰক। ভিটামিন-এ, চেলেনিয়াম, ক্ৰ’মিয়াম, জিংক, ভিটামিন-চি আৰু ই আদি এন্টিঅক্সিডেন্ট এই সময়ত শৰীৰৰ বাবে অতি গুৰুত্বপূৰ্ণ। ইহঁতৰ সংমিশ্ৰণ ৰোগ প্ৰতিৰোধ ক্ষমতা বৃদ্ধিৰ বাবে ভাল।
* ভিটামিন-চি চৰ্দি আৰু কাহ কমোৱাৰ বাবে বিশ্ববিখ্যাত। এই ভিটামিনৰ অনুপস্থিতিত শ্বেত ৰক্তকণিকাবোৰে ভাইৰাছ আৰু বেক্টেৰিয়া ধ্বংস কৰাত ব্যৰ্থ হয়। শৰীৰত ভিটামিন চিৰ অভাৱ কম কৰিবলৈ নিয়মিতভাৱে কমলা, আমলাকি, মুছুম্বী, আনাৰস, কবি, ফুলকবি বা ৰঙীন আলু খাব পাৰে। ধূমপানৰ অভ্যাস থাকিলে এই ভিটামিন শৰীৰৰ বাবে আৰু অধিক গুৰুত্বপূৰ্ণ। কাৰণ ধূমপানে কেৱল চৰ্দি ধৰাৰ প্ৰৱণতা বৃদ্ধি কৰাই নহয় লগতে ই শৰীৰৰ ৰোগ প্ৰতিৰোধ ক্ষমতাও বহু পৰিমাণে হ্ৰাস কৰে।
*প্ৰচুৰ পৰিমাণে গৰম পানী নিয়মিতভাৱে খাব লাগে। গৰম পানীৰ উপৰিও চূপ, ৰস, ষ্টু বা জোল খাব পাৰি কাৰণ এইবোৰে শৰীৰৰ পৰা বিষাক্ত উপজাত পদাৰ্থ আঁতৰোৱাত সহায় কৰিব।
*ভাইৰাছ আৰু বেক্টেৰিয়াৰ বিৰুদ্ধে যুঁজিবলৈ খাদ্যত হালধি ৰাখক। এই গৱেষণাৰ মতে যিসকলে নিয়মিতভাৱে হালধি খায়, তেওঁলোকৰ ৰোগ প্ৰতিৰোধ ক্ষমতা স্বাভাৱিক লোকতকৈ বেছি। দৈনিক সকলো ৰন্ধা-বঢ়াত হালধি কম পৰিমাণে ব্যৱহাৰ কৰিবলৈ চেষ্টা কৰক। ইয়াত শৰীৰে বিভিন্ন ধৰণৰ সংক্ৰমণ প্ৰতিৰোধ কৰিবলৈ সক্ষম হ’ব।
* আদাত জিঞ্জাৰল নামৰ প্ৰাকৃতিক উদ্ভিদ যৌগ থাকে যি ফ্লু প্ৰতিৰোধক হিচাপে ফলপ্ৰসূ। প্ৰতিদিনে চাহত আদা মিহলাই খাব পাৰে। অথবা আদাৰ ৰস অলপ মৌ আৰু গৰম পানী দি খাব পাৰে।
* প্ৰতিদিনে মুলা খালে নাক বন্ধ হোৱা, শ্লেষ্মা আৰু মূৰৰ বিষ কম হয়। কেঁচা মুলা চোবাই আপুনি সৰ্বাধিক লাভ পাব। সম্ভৱ নহ’লে সিজোৱাকৈ খাব লাগে। ঠাণ্ডা, ডিঙিৰ বিষ কমোৱাত মুলাৰ ৰস ফলপ্ৰসূ।
* খনিজ জিংক থকা খাদ্য, যেনে গোটা শস্য (বাজৰা, জলকীয়া, ঘেঁহুৰ কুঁহিয়াৰ, ঘেঁহুৰ বীজাণু, শেলফিছ, বাদাম, মচুৰ দাইল, স্কিমড গাখীৰ, আলমণ্ড, কচু) খনিজ জিংকৰ গুৰুত্বপূৰ্ণ উৎস।
* যিকোনো নিমখীয়া খাদ্য, যাৰ ফলত চকু পানী ওলাব পাৰে, নাক বন্ধ হোৱা বা বুকুৰ জমা হোৱাত উপকাৰী। চৰ্দি হ’লে মূলা, আদা, লং, সেউজীয়া মৰিচা, কাছুন্দি, মৰিচা, গৰম মছলা আদি খাব পাৰে। সকাহ পাব।
* বিটা-কেৰটিনযুক্ত শাক-পাচলি আৰু ফলমূল, যেনে- বিলাহী, কুমলীয়া ডালিম, ৰঙীন আলু, ব্ৰকলি, কচু, ভেণ্ডি, পীচ, চেৰী ইত্যাদি খাব পাৰে। এইবোৰে ৰোগ প্ৰতিৰোধ ক্ষমতা বৃদ্ধি কৰাত সহায় কৰিব।
*মেথিৰ গুণাগুণ
সেউজীয়া, সুগন্ধি মেথি বহুতৰে প্ৰিয়। অন্য বনৌষধিৰ লগত মেথি মিহলাই দিলে ইয়াৰ পুষ্টিকৰ মূল্যও বৃদ্ধি পায়। আনফালে ইয়াৰ সোৱাদ আৰু গোন্ধো অতুলনীয় ।
১. ইণ্ডিয়ান কাউন্সিল অৱ মেডিকেল ৰিচাৰ্চৰ তথ্য অনুসৰি প্ৰতিদিনে ২৫ গ্ৰামৰ পৰা ১০০ গ্ৰাম মেথি সেৱন কৰিলে তেজৰ চেনিৰ মাত্ৰা নিয়ন্ত্ৰণত থাকে।
২. মেথিত থকা চেপনিনে কলেষ্টেৰল কমোৱাত সহায় কৰে। উচ্চ ৰক্তচাপ আৰু ৰক্তহীনতা কম কৰিবলৈও মেথি ব্যৱহাৰ কৰিব পাৰি।
৩. ইয়াত ফলিক এচিড, ৰাইবোফ্লেভিন, পটাছিয়াম, কেলচিয়াম, আইৰণ, মেংগানিজ আদি গুণ আছে। লগতে ভিটামিন এ, বি ৬, চি, কে থাকে। ফলত হাড় শক্তিশালী কৰাৰ পৰা আৰম্ভ কৰি এন্টিঅক্সিডেন্ট যোগান ধৰালৈকে – মেথিৰ ভূমিকা আছে।
৪. ইয়াত পৰ্যাপ্ত পৰিমাণৰ আঁহ থাকে আৰু ইয়াত কেলৰি কম। যাৰ ফলত বাৰে বাৰে ভোক নাথাকে, তাৰ ওজন নিয়ন্ত্ৰণত থাকে।
৫. মেথিই পাচনতন্ত্ৰৰ সমস্যা হ্ৰাস কৰে, হৃদযন্ত্ৰৰ যত্ন লয়।
৬. ছালৰ শুকানতা দূৰ কৰাত মেথি পাত ফলপ্ৰসূ।
*পিতল আৰু ৰূপৰ বস্তু চিকচিকিয়া কৰি ৰখাৰ টিপছ*
পিতল আৰু ৰূপৰ পাত্ৰত খোৱাটো যেনেকৈ স্বাস্থ্যৰ বাবে উপকাৰী, তেনেদৰে ঘৰত এনে বস্তুৰ উপস্থিতিয়ে ঘৰৰ সজ্জাত বিলাসীতাৰ স্পৰ্শও যোগ কৰে। সেয়েহে আগৰ দিনত ব্ৰঞ্জ বা ৰূপৰ পাত্ৰ ব্যৱহাৰ কৰা হৈছিল।
যদিও আজি কাঁচ, ষ্টীল বা চিৰামিক বাচনৰ ঠেলা-হেঁচাত এনে বাচন-বৰ্তনে ডাইনিং টেবুলৰ সলনি শ্বেল্ফত স্থান দখল কৰিছে তথাপি কিন্তু আজিও উৎসৱ পাৰ্বনৰ দিনবোৰত তাম-ৰূপৰ বাচন-বৰ্তনেই ঘৰ একোখনত আগস্থান পাই আহিছে । কেৱল এয়াই নহয়, ঘৰৰ ভিতৰৰ সাজ- সজ্জালৈ ৰাজকীয় স্পৰ্শ অনাৰ ক্ষেত্ৰতো ইয়াৰ ভূমিকা আজিও সমানে আটুত আছে । কিন্তু দেখা যায় যে এই ধৰণৰ ধাতুবোৰত সাধাৰণতে ক’লা দাগ পৰে যিটো সময়মতে আঁতৰাই নিদিলে ক্ৰমান্বয়ে ব্যৱহাৰ কৰিব নোৱাৰা হৈ পৰে। ঘৰ এখনত ‘ৰয়েল ফিল’ অনা বস্তু এটাৰ যত্নও ৰাজকীয়ই হ’ব- এনে কথা নহয় যদিও কিছু পৰিমাণে কিন্তু যত্নৰ প্ৰয়োজন আছে । ইয়াত কিছুমান টিপছ দিয়া হ’ল-
বেকিং চোডা: বেকিং চোডা নেমুৰ ৰসৰ লগত মিহলাই মিশ্ৰণ বনাওক। এই মিশ্ৰণেৰে তাম বা পিতলৰ বাচন-বৰ্তন পৰিষ্কাৰ কৰিলে একেবাৰে নতুন দেখা যাব। ৰূপৰ বস্তু, অলংকাৰ, মূৰ্তি পৰিষ্কাৰ কৰিবলৈ এলুমিনিয়াম ফয়েলৰ টুকুৰা এটা বেকিং ছ’ডাৰ লগত মিহলাই ল’ব লাগে। এনে অৱস্থাত এটা ডাঙৰ বাটি লৈ তাত তিনি চামুচ বেকিং চোডা মিহলাই লওক। কেইটুকুৰামান এলুমিনিয়াম ফয়েলেৰে ঢাকি দিব। তাৰ পিছত তাত ৰূপৰ বাচন, অলংকাৰ, মূৰ্তি কিছু সময় তিয়াই থওক। অলপ পিছত শুকান কাপোৰেৰে মচি দিব। নতুন ৰূপৰ দৰে জিলিকি থকা আপোনাৰ ঘৰৰ আড়ম্বৰ পুনৰ ঘূৰি আহিব।
ভিনেগাৰ আৰু ময়দা: ওপৰৰ কোনো এটা উপাদান হাতত নাই, দোকানলৈ যোৱাৰ ইচ্ছা বা সময়ো নাই, তেনেহ’লে পাকঘৰলৈ যাওঁক। ভিনেগাৰ আৰু ময়দা নিশ্চয় থাকিব । একাপ বগা ভিনেগাৰ, এচামুচ নিমখ, তিনি চামুচ ময়দা আৰু পানী মিহলি কৰি লওক। ১৫ মিনিট তামৰ সামগ্ৰী তিয়াই থোৱাৰ পিছত স্ক্ৰাবাৰেৰে পৰিষ্কাৰ কৰক। ৰূপৰ সামগ্ৰীৰ বাবে ময়দাৰ সলনি কৰ্ণফ্লাৱাৰ মিহলাই লওক। ২০ মিনিট তিয়াই শুকান কাপোৰেৰে মচি দিব।
নেমু আৰু নিমখ: ধৰক ভিনেগাৰ আৰু ময়দাও নাই। কি কৰিব ? ঘৰত নিমখ আৰু নেমু নিশ্চয় থাকিব । আধা কাপ নেমুত নিমখ মিহলাই তাম বা পিতলৰ পাত্ৰত ঘঁহি দিব। এনেদৰে ২০ মিনিট ৰাখি ধুই পেলাব। ৰূপৰ বস্তুৰ বাবে এটা বাটিত বেকিং চোডা এগিলাচ ঢালি চাৰি চামুচ নেমুৰ ৰস দিব। ৰূপৰ বস্তুবোৰ ধুনীয়াকৈ পৰিষ্কাৰ হ’ব।
*পোহৰৰ ঠিকনা*
টেবুল লেম্প বা টিউব এতিয়া আউট, আহি গ’ল ঘৰ সজ্জাৰ আধুনিক ডিজাইনৰ লাইট।
টেবুলৰ মাজত এটা সৰু ইনডোর প্ল্যান্ট, ঘৰৰ ভিতৰৰ বা কোঠাটোৰ চুকত কাঠৰ শ্বেল্ফ, আধুনিক ঘৰ সজ্জাত বৈচিত্ৰ্যৰ অভাৱ নাই। কিন্তু ঘৰৰ চাৰিবেৰৰ ভিতৰত জীৱন কঢ়িয়াই আনিবলৈ সঠিক পোহৰ সজ্জাৰ প্ৰয়োজন। সাধাৰণ টেবুল লেম্প বা টিউব নহয়, এতিয়া অভ্যন্তৰীণ সজ্জাৰ ক্ষেত্ৰত উদ্ভাৱনীমূলক আৰু ভিন্ন পোহৰৰ চাহিদা বাঢ়িছে। কোঠা এটাৰ ৰূপ নিমিষতে সলনি কৰিবলৈ মাথো এটা ষ্টেটমেন্ট লাইটেই যথেষ্ট।
১. ৱাল লাইট: যদি ঘৰ সজ্জাৰ ক্ষেত্ৰত আধুনিক আৰু অগতানুগতিক বস্তু আপোনাৰ প্ৰথম পছন্দ, তেন্তে দেৱালত ওলমি থকা বা হুকত ওলমি থকা এই উদ্ভাৱনীমূলক ডিজাইনৰ লাইট আপোনাৰ বাবে আদৰ্শ। সঠিক ঠাইত ৰাখিলে কোঠাটোত যথেষ্ট পোহৰ থাকিব।
২. হেংগিং লাইট: এফালে সৰল, আনফালে কলাত্মক। এই নতুন ধৰণৰ লাইটিঙে ঘৰত আধুনিক আৰু বোহেমিয়ান ৰূপৰ সংমিশ্ৰণৰ সৃষ্টি কৰিব। ঠাই অনুসৰি বহু লাইটৰ একক হেংগিং বা ক্লাষ্টাৰ হেংগিং স্থাপন কৰিব পাৰি।
৩. টেবুল লেম্প: একেবাৰে পৰম্পৰাগত, কিন্তু ৰূপ সলনিৰ লগে লগে ইয়াৰ ডিজাইনে কোঠাটোৰ ৰূপ নিমিষতে সলনি কৰিব। কাম বা পঢ়াৰ বাবে টেবুল লেম্প অতি গুৰুত্বপূৰ্ণ বস্তু। কিনাৰ সময়ত নিশ্চয়কৈ এটা আড়ম্বৰপূৰ্ণ ডিজাইন বাছি লওক।
৪. চেণ্ডেলিয়াৰ লাইট: কালিৰ চেণ্ডেলিয়াৰবোৰ এতিয়া পুনৰ অতি আধুনিক ৰূপত অভ্যন্তৰীণ সজ্জাত। যদি ঘৰটোত পুৰণি আচবাব থাকে তেন্তে মিহিকৈ নিৰ্মিত চেণ্ডেলিয়াৰ এটাও ইয়াৰ লগত ভালদৰে মিলিব।
৫. ট্ৰাইপড লেম্প আৰু ফ্ল’ৰ লেম্প: কোঠাটোৰ চুকত ঠাই থাকিলে ওখ লেম্প এটা ৰাখক। ট্ৰাইপড লেম্পত সাধাৰণতে তিনিটা কাঠৰ ষ্টেণ্ডত লেম্পশ্বেড লগোৱা থাকে। ষ্টেণ্ড থকা ফ্ল’ৰ লাইটৰ কথা আহিলে এতিয়া আটাইতকৈ ট্ৰেণ্ডি হৈছে ক্রিষ্টাল লেম্পশ্বেড৷
ইয়াৰ উপৰিও উৎসৱমুখৰ লাইট, ফ্লাছ মাউণ্ট লাইট বা হাইড লাইট এতিয়া ইণ্টেৰিয়ৰ ডিজাইনৰ এক গুৰুত্বপূৰ্ণ অংশ।
*ঘুণপোকৰ পৰা সুৰক্ষা*
কাঠত পোকাৰ উপদ্রব নতুন কথা নহয়।
কিছুমান নিয়ম মানি চলিলে কাঠৰ আচবাব পোক-পৰুৱাৰ আক্ৰমণৰ পৰা সুৰক্ষিত হ’ব। ইয়াত টিপচ্সমূহ দিয়া হ’ল-
শাল, চেগুন, মেহগনি কাঠৰ বিচনা, ৱাৰ্ডৰব, ড্ৰেছিং টেবুল বা আধুনিক আলমাৰী – এইবোৰে ঘৰৰ ভিতৰলৈ নিমিষতে ৰাজকীয় আভিজাত্য আনিব পাৰে। ঘৰৰ সজ্জাত কাঠৰ ব্যৱহাৰ বহুতে খুবেই ভাল পায়। কিন্তু এই বিলাসীতাক সঠিক ৰক্ষণাবেক্ষণৰ প্ৰয়োজন। উপযুক্ত যত্নৰ অভাৱত ঘূণপোকবোৰে লক্ষ্য নকৰাকৈয়ে কাঠৰ আচবাবত বাহ সাজে। সময়ৰ লগে লগে এই পোকবোৰ কাঠৰ ভিতৰে ভিতৰে বাঢ়ি যায়। ভিতৰৰ শাহটো সম্পূৰ্ণৰূপে ফোপোলা হৈ যায়। গতিকে কাঠৰ আচবাবৰ আয়ুস বৃদ্ধি কৰিবলৈ উপযুক্ত যত্নৰ প্ৰয়োজন। যেনে-
ঘূণপোকে সাধাৰণতে তিতা কাঠত বাহ সাজে। গতিকে কাঠৰ আচবাব কিনাৰ আগতে কাঠ কেঁচাই আছে নেকি পৰীক্ষা কৰক। ঘৰৰ কোনো পুৰণি আচবাব তিতিলে ভাল ৰ’দত শুকুৱাই লওক। সাৱধান হওক যাতে কোনো ভিজা ঠাইত কাঠৰ বস্তু নাথাকে। লগতে বহুতো কাঠ আছে যিবোৰ ঘূণপোকে বিন্ধিব নোৱাৰে । এনে কাঠৰ আচবাব কিনিলে ভাল।
কাঠত কিবা ফুটা থাকিলে সেই ফুটাবোৰৰ মাজেৰে ঘূণপোক সোমাবলৈ সুবিধা পায় । গতিকে, কিনাৰ সময়ত নিশ্চিত হওক যে কোনো ফুটা নাই। পুৰণি আচবাবত যদি কিবা ফুটা থাকে তেন্তে লগে লগে মম বা তেনেধৰণৰ কিবা এটাৰে বন্ধ কৰি দিব লাগে।
ৰং, বাৰ্নিচ বা আলকাতৰাৰ আৱৰণে বহু পৰিমাণে ঘূণপোকক বাধা দিব পাৰে। গতিকে এই আৱৰণবোৰ এজন পেছাদাৰী ব্যক্তিৰ দ্বাৰা প্ৰয়োগ কৰক।
দৈনিক কাঠৰ আচবাব পৰিষ্কাৰ কৰক। লেতেৰা আচবাবত এই পোকে আক্ৰমণ কৰাৰ সম্ভাৱনা বেছি।
ক্ল’ৰপাইৰিফ’ছৰ দৰে ৰাসায়নিক কীটনাশক দ্ৰব্যও বজাৰত পোৱা যায়। স্প্ৰে বটলত লৈ ছটিয়াই দিব পাৰে। স্প্ৰে কৰাৰ পিছত ফুটাবোৰ বন্ধ কৰি দিব লাগে। কেৰাচিন তেলো ব্যৱহাৰ কৰিব পাৰে। এই ক্ষেত্ৰত নিমৰ পাত অতি উপযোগী। আচবাবত পোক-পৰুৱাৰ আক্ৰমণ কম কৰিবলৈ প্ৰতি ছমাহৰ মূৰে মূৰে নিম তেল স্প্ৰে’ কৰিব লাগে। নাৰিকল তেলৰ লগত কৰ্পূৰ মিহলাইও স্প্ৰে কৰিব পাৰে।
আচবাবৰ কোনো অংশত যদি ঘূণে ধৰে তেন্তে তাক শীঘ্ৰে আঁতৰ কৰি দিয়ক যাতে সি আন ঠাইলৈ বিয়পিবলৈ সুবিধা নাপায় । যদি আচবাবৰ কোনো অংশ সম্পূৰ্ণৰূপে ক্ষতিগ্ৰস্ত হয় তেন্তে তাক পেলাই নিদিব। ক্ষতিগ্ৰস্ত অংশটো কাটি উলিয়াই নতুন কাঠেৰে সলনি কৰি পুনৰ ব্যৱহাৰ কৰিব পাৰে।
গতিকে নিশ্চয় জানিলে যে সঠিক যত্ন আৰু ৰক্ষণাবেক্ষণৰ সৈতে আপোনাৰ ঘৰৰ কাঠৰ আচবাববোৰ সুন্দৰ কৰি ৰাখিব পাৰি ।
*পৰিয়ালৰ কনিষ্ঠজনৰ বাবে এটা সপোনৰ ঘৰ*
ঘৰৰ আটাইতকৈ সৰু সদস্যজন আটাইতকৈ গুৰুত্বপূৰ্ণ! গতিকে তেওঁৰ কোঠাটোও বিশেষ হ’ব লাগে। এফালে তেওঁক খেলিবলৈ ঠাই দিব লাগিব, লগতে কনমাণি মূৰটোৰ সকলো সৃষ্টিশীলতা দেখুৱাবলৈ সুযোগ দিব লাগিব। নিজৰ কোঠাৰ দেখভাল যাতে নিজে কৰিব পাৰে সেই স্বাধীনতাও দিব লাগিব ।
কোঠাটোৰ সকলো আচবাব আৰু বেৰৰ ৰং নিৰ্বাচনৰ ক্ষেত্ৰত শিশুসকলৰ সিদ্ধান্তক সন্মান কৰক। ইয়াৰ দ্বাৰা তেওঁৰ ব্যক্তিত্বও প্ৰকাশ পাব, আৰু আপুনিও তেওঁৰ বিষয়ে নতুন কিবা এটা জানিব পাৰে। আৰু তেওঁ যদি কোঠাটোৰ এখন বেৰ কেৱল অংকন কৰাৰ বাবে বিচাৰে, তেন্তে সেই বেৰখনত ডাঙৰ ক’লা বৰ্ড এখন লগাব পাৰে।
শিশুৰ কোঠাত যথেষ্ট ৰেক, কেবিনেট আৰু ৱাৰ্ডৰব লাগে। তেওঁৰ কাপোৰবোৰ থ’ব লাগে, লগতে স্কুলীয়া ল’ৰা-ছোৱালীৰ বহু বস্তু। আৰু ল’ৰা-ছোৱালীয়ে বহুতো বস্তু জমা কৰি ভাল পায় যিবোৰ আপুনি অপ্ৰয়োজনীয় বুলি ভাবিব পাৰে। সেইবোৰ ৰাখিবলৈ আৰু প্ৰদৰ্শন কৰিবলৈ তেওঁক ঠাই দিয়ক।
কিতাপৰ আলমাৰী আৰু খেলনাবোৰ এনে এটা উচ্চতাত বনাওক য’ত তেওঁ সহজে ঢুকি পাব পাৰে আৰু নিজৰ বস্তুবোৰ থৈ দিব পাৰে। বিভিন্ন বস্তুৰ শ্বেলফবোৰ যদি বেলেগ বেলেগ ৰঙৰ হয়, তেন্তে সেইবোৰেও তেওঁক আনন্দ দিব।
কোঠাটোৰ পঢ়া টেবুল-চকী, পৰ্দা আৰু আন সকলো আনুষংগিক বস্তুত তেওঁৰ প্ৰিয় কমিক চৰিত্ৰৰ ৰং, আৰ্হি বা ছবি যোগ কৰক। কিন্তু শিশুৰ কোঠাত কেতিয়াও অতিৰিক্ত আচবাব নাৰাখিব। বাকী কোঠাটো তেওঁৰ নিজৰ ইচ্ছামতে ব্যৱহাৰ কৰিবলৈ এৰি দিয়ক, কিছুমান প্ৰয়োজনীয় আচবাবৰ বাহিৰে।
শিশুৰ কোঠাৰ এটা গুৰুত্বপূৰ্ণ বস্তু হ’ল তেওঁলোকৰ বিচনা। বৰ ডাঙৰো নহয়, কিন্তু কেইদিনমানৰ পিছত ভৰি দুখন বিচনাৰ পৰা যাতে ওলাই নাহে ঠিক তেনেকুৱা বিচনা এখন কিনি দিয়ক! শিশুৰ বৃদ্ধি অতি সোনকালে হয়, গতিকে মধ্যমীয়া আকাৰৰ বিচনা এখন কিনিলে ভাল। একেটা কোঠাতে দুজন মানুহ থাকিলে বাংক বেড এখন ৰাখিব পাৰে। অকলে থাকিলেও তলত অধ্যয়নৰ টেবুল থকা বাংক বেড এখন ৰাখিব পাৰে। ল’ৰা-ছোৱালীয়ে বাংক বেড ভাল পায়।
এতিয়া শিশুক সৰুৰে পৰা কম্পিউটাৰৰ প্ৰয়োজন। গতিকে অধ্যয়নৰ টেবুলখন এনেদৰে বনাওক যাতে প্ৰয়োজন হ’লে তেওঁৰ ডেস্কটপ কম্পিউটাৰ আৰু প্ৰিণ্টাৰটো ৰাখিবলৈ ঠাই থাকে।
শিশু কোঠাৰ আন এটা গুৰুত্বপূৰ্ণ অংশ হ’ল পোহৰ। গোটেই কোঠাটোত পৰ্যাপ্ত পোহৰ লগাব লাগে, লগতে অধ্যয়নৰ লেম্প আৰু নাইট লেম্পৰো প্ৰয়োজন। বিভিন্ন ডিজাইন আৰু ৰঙৰ লাইট শিশুৱে ভাল পাব।
কেৱল ট্ৰেণ্ডি বুলিয়েই ল’ৰা-ছোৱালীৰ কোঠাৰ বাবে কিবা এটা কিনিবলৈ নাযাব। শিশুৱে কিছু সময়ৰ পিছতে বস্তুটো ব্যৱহাৰৰ প্ৰতি আগ্ৰহ হেৰুৱাব পাৰে। সেয়ে তেওঁৰ মতামতক অধিক গুৰুত্ব দিবলৈ যত্নপৰ হওক ।
